«Korrupsiya hám onıń unamsız aqıbetleri» atamasındaǵı ushırasıw keshesi

 2025-jıl 9-dekabr  kúni  “Korrupsiya hám onıń unamsız aqıbetleri” atamasında 17071-áskeriy bólim orayında ushırasıw keshesi shòlkemlestirildi.  Keshege 17071-áskeriy bólim orayı kitapxanashısı J. Joldasova, áskeriy bólim tárbiyashısı Kapitan M. Xudoyberganov, Qaraqalpaqstan Respublikası Aymaqlıq jollarǵa buyırtpashı xızmeti mámleketlik kárxanası bas yuristi U. Rahmanova, Qaraqalpaqstan Respublikası statistika basqarmasınıń bas yuriskonsultı A.Masheripova Qaraqalpaqstan Respublikası Málimleme-kitapxana orayı Huquqıy maǵlıwmatlar sektor baslıǵı N. Jumaniyazova hám 17071-áskeriy bólim  áskerleri qatnastı. 

Ilaj dawamında qánigeler tárepinen korrupciyanıń kelip shıǵıw sebepleri, onıń jámiyet hám mámleket qáwipsizligine tásiri, onıń aldın alıwda ámeldegi nızamlar hám mexanizmler haqqında tolıq maǵlıwmatlar berildi. Sonday-aq, huqıqıy mádeniyattı arttırıw, huqıqıy málimlemeden paydalanıw imkaniyatları, mámleketlik xızmette hadallıq hám ashıq-aydınlıq principlerin bekkemlew boyınsha pikir-usınıslar bildirildi.

U.Raxmanova korrupciyaǵa qarsı gúresiwdiń huqıqıy tiykarları, xızmet tártibi hám juwapkershilik máselelerine toqtap ótip, hár bir xızmetkerdiń jeke juwapkershiligi joqarı ekenligin ayrıqsha atap ótti. A.Masheripova statistikalıq maǵlıwmatlar tiykarında aymaqta korrupciyaǵa qarsı kórilip atırǵan ilajlar haqqında maǵlıwmat berdi.

Kitapxanashı J.Joldasova hám N.Jumaniyazova tárepinen qatnasıwshılarǵa huqıqıy ádebiyatlar, elektron maǵlıwmatlar bazaları hám puqaralardıń huqıqıy mádeniyatın arttırıwǵa xızmet etetuǵın zamanagóy málimleme resursları menen tanıstırıldı.

Ilaj sońında áskerler menen ashıqtan-ashıq sóylesiw ótkerilip, olar ózlerin qızıqtırǵan sorawlarına qánigelerden hár tárepleme juwaplar aldı. Ushırasıw áskeriy xızmetkerler arasında huqıqıy sana hám mádeniyattı arttırıw, korrupciyaǵa qarsı immunitetti qáliplestiriw jolında áhmiyetli qádem boldı.