Ádebiyatshı alım hám jazıwshı Kamal Mámbetovtıń tuwılǵanınıń 85 jıllıǵına arnalǵan «Ádebiyatshı alım hám úlgili ustaz» atamasında obzor

2025 - jıl 25 - dekabr kúni Qaraqalpaqstan Respublikası Málimleme kitapxana orayı Maǵlıwmat bibliografiya xızmeti tárepinen Ózbekstan mámleketlik kόrkem – όner hám mádeniyat institutı Nόkis filialı studentlerine ádebiyatshı alım hám jazıwshı Kamal Mámbetovtıń tuwılǵanınıń 85 jıllıǵına baǵıshlanıp «Ádebiyatshı alım hám úlgili ustaz» atamasında obzor ótkerildi.

Obzorǵa instituttıń «Kitapxana – xabar iskerligi» jόnelisi 2 – kurs student jasları qatnastı. Obzorda Maǵlıwmat - bibliografiya xızmeti bas bibliografı Guldarixa Yuldashova qatnasıwshılarǵa qaraqalpaq xalıq jazıwshısı, Qaraqalpaqstanda xızmet kórsetken ilim ǵayratkeri, Berdaq atındaǵı Qaraqalpaqstan Mámleketlik sıylıǵınıń laureatı, filologiya ilimleriniń doktorı, professor Kamal Mámbetovtıń ómiri hámde ilimiy – dόretiwshilik xızmetleri haqqında aytıp ótti. Bunnan soń Kamal Mámbetovtıń ómirine baǵıshlanǵan bir qansha ádebiyatlar hám ilimiy miynetleriniń qısqasha mazmunı menen tanıstırdı.

Qatnasıwshılar kόrgizbege qoyılǵan kitaplar menen jaqınnan tanısıp, alǵan tásirleri haqqında óz-ara pikir alıstı hámde Kamal Mámbetovtıń ilimiy miynetleri haqqında jánede keńirek túsinikke iye boldı.